نصائح قبل الامتحانات
.
- دا مش وقت مذاكرة .. حل امتحانات وابصم.
- لما تاخد الاجازة خد نفسك يومين وارجع ذاكر مذاكرة فهم.
- اوعي تطبق .. لازم تنام قبل الامتحان 6 ساعات على الاقل بتتوسطهم صلاة الفجر.
- زيك زى اى انسان سوى بتتخنق اول ماتفتح كتاب .. معلش .. جاهد نفسك اول ربع ساعة واقفل تليفونك خالص .. هتدخل في المود وهتقعد بالساعات باذن الله.
- نومك على مرتين افضل مليون مرة من نومك على مرة واحدة.
- هات ورقة اتنيها نصين بالطول .. الجزء اليمين جمع فيه قوانين المادة والشمال التعاريف والاسئلة المهمة .. اكتب بخط صغير بحيث تعرف تلم المادة كلها فيها .. ذاكر منها وسيبها برا اللجنة وانت داخل امتحانك وخدها بعد ماتخلص.
- طريقة مذاكرتها انك هتمسك 5 اسئلة او تعاريف وتكتبهم اكتر من مرة لحد ماتحفظهم .. وتنقل على خمسة بعدهم .. ثم بعدهم .. وبعد كل خمسة تكتب كله من الاول لحد ما تخلص.
- سيبها برا وانت داخل اللجنة .. ياحلو انت ياحلو ..
- الورقة دى هتحسسك ان المادة صغيرة وهتساعدك تكون ذاكرة بصرية .. لكا يجيلك سؤال هتفتكره وتفتكر كمان مكانه في الورقة.
- الورق دا هيبقي كنز بالنسبالك لما تتخرج وسهل تسترجع اى مادة من خلاله بسهولة وهتدخل الانترفيوهات فارق اوي عن زمايلك.
- روح الامتحان متأخر خمس عشر دقايق على ما دوشة المراقبين تخلص. لو حضرت الدوشة هتفقد كتير من تركيزك.
- اول ماتدخل الامتحان متبصش على ورقة الاسئلة .. افتح كراسة الاجابة على اخر صفحة واكتب كل القوانين اللى في دماغك واى حاجة خايف تنساها.
- بلاش غباوة .. اى رقم يطلع مش منطقى متكتبوش او اكتب جنبه Unlogic والافضل تفبركه .. ماحنا مش هنمشى بالكالكليتور ورا سيادتك يعني .. ابوس ايدك متكتبش قطر الترس بالكيلوميتر.. وفيات الدكاترة معظمها بسبب الاجابات دي.
- تنظيم الورقة لو هيستهلك وقت بلاش منه .. الاهم تنظيم الاجابة.
- لو مصاحب فركش فترة الامتحانات .. اسهل طريقة للفركشة انك تقارنها بواحدة تانية .. مانت زبالة بقي وبتاع بنات ومش هتفرق معاك مشاعرها ..
- بلاش استعباط .. لو مصاحب اكتر من بنت فشكل معاهم كلهم يا واطي يا مذبلح.
- بص علشان مضحكش عليك .. لو فركشت بس علشان الامتحانات هتفضل سيئاتك زى ماهي .. لان اهم شروط التوبة الندم .. فركش واندم ..
- لو مصاحبة قوليله جالى عريس راجع من العراق وعنده توستر وميكروباظ وامي موافقة.. يا يخطبك يا يخلع .. وفى كلا الحالتين انتى الكسبانة.
- اياك و رفقاء السوء من اصحابك الاوباش .
- الفيس فيه سم قاتل .. و Pubg انيل.
- اخر نصيحة علشان تفتكرها .. اهم حاجة الفترة دى حل الامتحانات حتى لو مقفل المادة عشر مرات.
.
.
والدك يستحق انه يشوف نتيجة تعبه في نتيجتك .. بلاش تكسر بخاطره.
