خطورة التربية بالثواب والعقاب
إعادة نشر بعد انتشار الصورة المرفقة
احتراما لوقتك البوست هياخد منك دقيقتين
.
اسلوب الثواب والعقاب هو اكتر اسلوب تربية منتشر بيننا حاليا .. لو خلصت الهوم ورك هتلعب ساعة بلاى ستيشن .. لو معملتوش هضربك 10 ضربات وابوك هيبات فى الريسبشن !!
.
الكلام دا كارثى .. والسبب ان الولد هنا مبيكونش غايته انه يعمل الصح او يتجنب الغلط .. بيبقى هدفه انه يفوز بالثواب و يتحاشى العقاب .. وبالتالى فى حال غياب الابوين مش هيدور على الصح لانه متعلموش .. هيدور على اكتر حاجة تشبع رغباته حتى لو كانت خاطئة ..
.
ناهيك ان اسلوب العقاب الدائم بيسبب مشاكل تانية .. زى ان الطفل اما بيتحول لمسخ ملوش شخصية .. جبان لدرجة المرض .. إمعة .. او بيتحول لكائن متمرد وصايع ..
.
المثال التاني ميقلش خطورة عن الاول .. السبب ان العقاب الدائم بيتسبب فى الاتي :
1- ياكش تولع : دى الحالة اللى بيوصلها الطفل لما طول الوقت يحس انه مذنب فى عيون اهله حتي لو معملش حاجة .. برضو هيكون متهم .. فاللى هو ياكش تولع .. مادمت كدا كدا متهم فاعمل اللى انا عايزه بقى وخلاص .
2- التمرد : احساس الطفل الدائم انه ضعيف ادام اهله وانه بيمشوه على مزاجهم بيخليه يتمرد عليهم وبدون تفكير يعمل عكس اللى بيطلبوه منه تماما .. اعمل الواجب .. مش عامل .. كلم اختك كويس .. هديها بالشلوت .. خلص طبقك .. هسرق 50 جنيه واجيب بيهم برجر!!
3- اللؤم : واحدة واحدة الولد بيكتسب مهارة ( اللؤم ) .. اللى هى ببساطة ( انا مش بس هعمل عكس اللى هم عايزينه .. دنا كمان هعمل مصايب وهتفنن فى انهم مش هيعرفوا انى انا اللى عملتها ) .. ولو انكشفت المرادي المرة الجاية مش هنكشف ..
.
.
كمان لازم تاخد بالك .. انك حتى لو اضطريت تلجأ لأسلوب العقاب فمطلوب منك انك تعاقب على قدر الخطأ واياك تتسبب فى اذى نفسى للطفل .. اياك تهينه .. اياك تلومه طول الوقت على افعاله .. واياك .. اياك .. تستخدم لفظ ( غبي ) معاه .. وتحاشى دايما انك توبخه وسط اخواته .. ولو فكرت تعمل كدا ادام اصحابه ( هتخليني امد ايدي عليك ).. ولما تنبهه لغلطة غلطتها تكون مرة واحدة .. مش فى الرايحة والجاية تفكره بيها !!
.
طيب هل دا معناه اننا نتخلى بالكلية عن اسلوب الثواب والعقاب ؟!!
الاجابة لا .. بالعكس احنا احيانا بنضطر ليه .. ناهيك انك هتستدعيه بشكل دائم وانت بتزرع فى ابنك العقيدة المنضبطة .. امتى بقى نستخدمه وازاى .. نبقى نتكلم عليها مرة تانية ان شاء الله ..
.
ربوا_عيالكم
