أهمية المشاعر السلبية للطفل

احتراما لوقتك البوست هياخد منك دقيقتين

.
اكبر كارثة ممكن تعملها فى حق طفلك انك تحرمه من تجربة المشاعر السلبية فى صغره زى الحزن .. الاستياء .. الاحباط .. العجز ..
السبب فى كلامى دا ان ابنك لو ممرش بالمشاعر دى كلها فى صغره – تحت اشرافك وبدون مسئوليات عليه – هيتحول لكائن هش .. ضعيف جدا .. ضحية سهلة للاكتئاب وما بعده .. لانه بلا شك هيتعرضلها مستقبلا .. وبدون تجربة مسبقة هتكون بالنسباله مشاعر صادمة لابعد الحدود .. وهتأثر فيه اضعاف اضعاف تأثيرها الطبيعي ..
.
عايز تشوف تأثير المعني دا بوضوح .. روح اى كلية هندسة يوم النتيجة واتفرج على الولاد والبنات .. البنات بيبقوا شبه الطفلة ( بو ) لما شافت شلبي سلوفان بيخوف طفل فى اخر الفيلم .. لانهم مجابوش تقدير .. ولو جابوا تقدير ففيه اللى جاب اعلى منهم .. و الولاد بيشغلوا على موبايلاتهم ( اولاد سليم اللبانين ) وهاتك يارقص علشان طلعوا بمادتين ..
.
مش صح اطلاقا انك تمنع ابنك من الغلط .. سيبه يغلط ما دام غلطه مش هيدمر الدنيا .. وتابع باهتمام مردود الخطأ دا عليه .. وساعده يتعامل معاه بشكل صحيح .. هو دا المطلوب منك ..
.
لاحظ حزنه بعد ما يزعل مامته.. حول مشاعره السلبية لطاقة ايجابية .. اه يا حبيبي انت زعلت ماما بس تعالى نقعد نفكر ازاى ممكن نصالحها .. بعد شوية تفكير افتراضي بيحسسه بقد ايه اللى عمله غلط لكن فيه فرصة لتصحيحه وعليه انه يقتل نفسه علشان يوصل للحل .. قوله انا ممكن ( أسلفك ) 10 جنيه وتجيبلها شيكولاتة تصالحها بيها ..
ساعتها هتبقى كسبت انك عودته على انه ميستسلمش لمشاعر الحزن ويدور على طريقة يعالج بيها خطأه ويغير حالته النفسية من الحزن للفرح .. كمان يحس بالمسئولية ويعرف ان الخطأ اللى عمله دا ( عاقبته ) ان ماما هتزعل مني .. و انى هدفع 10 جنيه من مصروفى علشان اصالحها .. بالاضافة الى انك بتزرع فيه الحنان .. فمش هتلاقيه فى يوم بيبلطج على اخته ولا بيزهق عليك انت ومامته لما تشيبوا ..
.
لاحظ ندمه بعد معصيته .. مصلاش المغرب مثلا وفضل يماطل لحد ما العشاء اذنت .. والولد لسة عنده 7 سنين .. اول مرة هيعمل كدا هيحس بضيق لانه حس انه اخطأ .. لو الموضوع دا اتكرر من غير ما ( تنمي ) مشاعر ( الندم ) عنده .. وتنمي ( ادراكه لعظمة الصلاة ) .. هتلاقى انه بيكررها مرة ورا التانية لحد ما يتعود عليها ..
فالحل هنا انك تحكيله حواديت تجمع فيها بين الحب والخوف والرجاء .. مع تعظيم امر الصلاة بتوضيح ماهيتها .. انه بيكون واقف امام الله .. بيتكلم مع الله .. بيطلب اللى هو عايزه من الله .. إلخ
وبعد دا كله عرفه ( ان اتبع السيئة الحسنة تمحها ) .. وعوده على كدا .. وعلى الاستغفار بعد كل خطية ..
.
.
هنا هتلاحظ الفرق بين طريقتنا فى التعامل مع الندم الاول المصاحب بحزن .. والندم التاني المصاحب بتأنيب ضمير .. الاول بتحاول تتخطاه بتصويبه .. والتاني بتحاول تنميه برضو مع تصويبه ..
.

ربوا_عيالكم