عقيدة محمد الفاتح

.
محمد الفاتح احد اعظم القادة العسكريين فى تاريخنا الاسلامي .. مفيش اتنين بيختلفوا عليه الا انى فوجئت باتهام البعض دار الافتاء بالتضليل لانها وصفته بالقائد ( الصوفي ) العظيم ..
.
الحقيقة انه كان ماتريدي صوفي .. وصلاح الدين كمان بالمناسبة كان اشعري .. لكن خلينا فى حدوتة محمد الفاتح دلوقتي ..
.
النبي صلى الله عليه واله قال ( لتفتحن القسطنطينية، فلنعم الأمير أميرها، ولنعم الجيش ذلك الجيش ) .. والحديث صححه كثير من اهل العلم ..
.
طيب هل فيه تعارض بين كونه ماتريدي وبين ثناء النبي عليه ؟ هل ممكن النبي يثني على واحد عقيدته غير منضبطة بميزان الشرع ؟!
.
العلماء اختلفوا فى النقطة دى .. من السلفيين اللي قالوا خد بالك ان الحديث اصلا مختلف فى صحته .. وبعدين حتي لو صحيح ايه المشكلة ؟ الثناء كان عليه اجمالا مش على عقيدته .. غير ان محمد الفاتح اصلا كان من العوام .. مكنش شيخ ولا طالب علم .. يعني مقلد فلا حرج عليه .. اتولد لقى نفسه فى بيت ماتريدي صوفي فبقى ماتريدي صوفي زيهم ..
.
والحقيقة عندى مؤاخذة على الكلام دا .. وهى ان التقليد فى امور الاعتقاد غير جائز .. وحقيقي مش قادر افهم يعني ايه تبقى شايف ان اى مسلم ممكن يقلد اعتقاد شيخه عادى وزعلان ان جورج المسيحي بيقلد اعتقاد ابوه .. ما الاتنين عوام .. هل نرفع عنهم التكليف فى ايمانهم بالله ومعرفته ؟!! اعتقد دا من العبث بمكان ..
.
علماء الماتريدية قالوا ان الحديث فيه دلالة على صحة العقيدة الماتريدية الصوفية .. والا مكنش النبي صلى الله عليه واله وسلم اثني علي الامير الماتريدي الصوفي .. والحديث صحيح اهو .. عادي اهو ..
.
وبرضو بستغرب جدا كلامهم .. لان احد اشد الفروق جوهرية بين العقيدة السلفية و الماتريدية ومعاها الاشعرية .. ان الماتريدية والاشعرية بيرفضوا الاخذ بأحاديث الآحاد في امور الاعتقاد .. بيقولوا ان احاديث الاحاد حتي الصحيح منها ظني الثبوت ( و دا مفيش خلاف عليه ) .. فازاى ناخد عقيدتنا من احاديث مش متأكدين من ثبوتها ؟!! بيخالفهم السلفيين وبيقولوا احنا لو سبنا كل احاديث الاحاد الدين مش هيبقى فيه حاجة ..
طب منين بقى ياعم الماتريدي بترفض احاديث الاحاد فى امور الاعتقاد وبتحتج بحديث احاد وكمان مختلف فى صحته كدليل على صحة عقيدتك الماتريدية ؟!!
.
.
وللامانة .. من علماء السلفية اللى شطح بعيد خالص وقالك ان حديث النبي صحيح اه لكن ميقصدش الفتح اللى كان على ايد محمد الفاتح .. وقالك الدليل على كدا ان عقيدته فاسدة واكيد النبي مش هيثني علي حد عقيدته فاسدة !!
.
.
الخلاصة ان محمد الفاتح فعلا كان صوفي ماتريدي والكلام دا محل اتفاق اصحاب الاراء اللى ذكرتها .. ومش شايف انها حاجة مهمة اوى اننا نتكلم فى اعتقاده .. بل نكتفى بوصفه بالقائد المسلم دون تمييز ..
.
صورة افتراضية للقائد اللى بحبه جدا .. محمد الفاتح .. وهو مش واخد باله الرايق
.
.
تعديل :
الاخوة اللى بيستدلوا بحديث فتح القسطنطينية بالتكبير على ان الفتح فى حديث الثناء المذكور فى اول البوست مش مقصود بيه محمد الفاتح ..
الكلام دا مش صحيح .. ايه علاقة الحديثين ببعض ؟! ليه ميبقاش كل حديث بيتكلم عن فتح مختلف ؟! عندك دليل على ان الحديثين بيتكلموا عن نفس الفتح ؟ لا
يبقى الاصل الفقهي يتكلم ويقول ( اذا تطرق الدليل الى الاحتمال كساه ثوب الاجمال وسقط به الاستدلال ) ..