الهندسة Vs العلم الشرعي
.
البوست دا عامله مخصوص اللى بيستشيروني فى نقطة ترك الهندسة للتفرغ للعلم الشرعي ..
.
ابتداءا العلم الشرعي قسمين :-
1- قسم فرض عين : ودا كل مسلم مكلف بيه .. الجزء اللى بنقول عليه ( ما لا يسع المسلم جهله ) .. الجزء اللى بتصح بيه عباداتك اليومية .. مش الـ Advanced level ..
2- قسم فرض كفاية : دا بقى القسم الـ Advanced .. ومعتقدش ان فيه اتنين يختلفوا على اننا محققين الكفاية فيه ..
.
.
- طيب هل صح اني تسيب الهندسة علشان اتفرغ للعلم الشرعي ؟!!
- الاجابة لا .. قطعا لا ..
. - ليه ؟
- لان الامة عندها ضعف شديد جدا فى الهندسة محتاجين نجبره .. ولانك بتركك للهندسة هتكون معول هدم للدعوة .. هتنفر الناس من الالتزام وتخوفهم منه بدون ما تقصد .. هيشوفوك درويش ويخافوا على ولادهم من الطريق دا ..
.
من ناحية تانية العلم الشرعي غير كل العلوم .. العلم الشرعي محتاجك طول الوقت ايمانياتكم عالية علشان تقدر تكمل .. لو وقعت يا صاحبي مش هتقدر تراجع ورد القرآن فضلا عن الحديث والمتون .. متأكد انك طول الوقت ايمانياتك وحماسك هيفضلوا مرتفعين ؟ ولا هتقع ويقع معاها مستواك العلمي وتبقى زى اللى رقص عالسلم .. لا حصلت علم شرعي ولا بقيت ملتزم ناجح عمليا والناس بتعتبره مثال مشرف؟!
. - بس انا مش مميز اوى فى الهندسة .. ولما بدأت طلب علم شرعي لقيت نفسى سابق كل اللى معايا .
- ما دا طبيعي يا حبيبي .. الهندسة بترفع من مستواك الذهني بشكل بشع .. منهج الثانوية العامة انت بتخلصه فى اول محاضرتين فى الترم ..أقولك ؟ جرب تذاكر علم نفس .. هتلاقى نفسك فى خلال سنة اتحولت لفرويد وبياجيه .. انا نفسى قرأت فى سنة واحدة 30:40 كتاب علم نفس منهم كتب امهات علشان اقدر اربي اولادي تربية سوية !!
.
.
عايز تطلب علم شرعي اشطة .. دى حاجة عظيمة .. بس هتتمرقع وتسقط وتشيل مواد لا .. خليك قد المسئولية واظهر دينك بشكل كويس .. دينك اللى بيقولك تجتهد وتنجح .. اللى بيقولك ان الناس كلها مفروض تشوف الاسلام فيك ..
