الأسد الرهيص قاتل عنترة بن شداد

احتراما لوقتك البوست هياخد منك دقيقتين

.
كلنا عارفين قصة عنترة لكن فى الغالب منعرفش انه اتقتل على ايد ( كفيف ) اسمه وزر الطائي الملقب بـ ( الأسد الرهيص ) ..
.
الحدوتة بتقول ان وزر الطائي نشأ فى نفس وقت عنترة .. وسمي بالاسد الرهيص لانه كان بيصطاد الاسود والسباع لوحده ويرجع يتباهي بصيده؛ غير انه كان مقاتل عنيد جدا ودايما بينتصر على اى حد بيبارزه ..
.
وزر الطائي كان عامل فيها شبح وكان بيغير على القبائل التانية فى حائل .. وكان بيسرق غنمهم ودهبهم ويرجع بيه .. وفي يوم جاب كبش وحطه ادام خيمته ولبسه كتير من الحلي اللى سرقها و ألزم اى حد يمر بالكبش انه يضع من امواله جنبه و عين علي الكبش دا مجموعة كبيرة من الحراس .. شبحنة وكدا ..
.
عنترة كان اتجوز عبلة .. عبلة سمعت بخبر الاسد الرهيص فرمت كلام ادام عنترة انه جامد وكدا وعاجبها .. عنترة سخن فاخد عبلة وشيبوب و هبأ على حائل قتل كل حراس الكبش و خد الكبش من قرونه ودخل خيمة وزر الطائي فلقاه مش موجود وزوجته بس الموجودة .. فدبح الكبش وقالها اطبخيهولنا يا ولية .. فطبخته ..
.
وزر رجع من برا لقى مراته بتخدم على عنترة فسخن فقاتل عنترة .. في ظرف فيمتو ثانية عنترة قلبه من على حصانه وقيده و جره وراه لحد قبيلته .. وبعد فترة من السجن قرر انه يسيبه بس قبل ما يسيبه وضع سم فى عينه علشان يعميه .. وبعدما اصابه العمي تركه ..
.
بعد عشرين سنة عنترة كان بيغير على قبيلة مجاورة لقبيلة وزر .. فطلب وزر من خادمه انه ياخده للمكان اللى فيه عنترة .. وكان ماسك سهم ويقال رمح .. ونادي على عنترة ولما سمع صوته حدد اتجاهه ورمي بالسهم فاصابه ..
.
عنترة عمل فيها بيج رامي واخرج السهم ونادي عليه بصوت طبيعي وكأن شىء لم يكن .. اتفقع وزر فمات !! .. ومشى عنترة لكنه مكنش يعرف ان نصل السهم كان مسموم .. فعاش بعدها 6 ايام وبعدين بدأ تأثير السم يظهر ومات.
.
.
يا اخي العرب دول كان فيهم شوية رمم وعايشينها بلطجة بس مستحيل ينسوا حقهم ابدا ولو بعد عشرين سنة ..
مش احنا اللى نسينا مقاطعة فرنسا بعد شهر !!
كانوا رجالة ..