انهيار امريكا الوشيك .. الجزء الاول : البترودولار .. اكبر عملية نصب فى التاريخ

اعادة نشر : منشور بتاريخ 6-11-2015

احتراما لوقتك البوست هياخد منك 3 دقايق ..

الحدوتة بدأت من حوالي 85 سنة .. حصل انهيار لأسواق المال الامريكية تبعته كوارث اقتصادية فى امريكا ودول مختلفة فيما سمي وقتها بـ (( الكساد الكبير )) ..

الحدث دا كان صدمة بالنسبة لرجال الاقتصاد فى العالم اجمالا بلا استثناء .. وكانت تجربة جديدة عليهم .. وفى ظل تخبط اسواق المال العالمية وانهيار اقتصادات الدول اخدت امريكا اهم قرار اقتصادي فى تاريخها .. قررت انها متاخدش من الدول التانية بنكنوت ( عملات ورقية محلية ) مقابل صادرات امريكا ليها .. طب ايه المقابل ؟؟ الدهب .. فكل صادرات امريكا فى الوقت دا كانت بتاخد تمنها دهب .. كذلك كل تعاملاتها المالية ..
.
دا كان سبب فى ان امريكا تكوش على اكتر من 85% من احتياطى الذهب فى العالم .. واللى وصل حاليا لـ 75.2% حسب اخر رقم قرأته .. و دا اللى خلى الدول التانية تثق فى قوة وثبات العملة الامريكية ( الدولار ) واعتبارها العملة الاكثر امانا فى العالم وبدأت بعض البنوك المركزية فى الدول المختلفة تحويل الاحتياطي من الدهب للدولار .. ودا اللى رفعه اكتر واكتر .. وبالمناسبة دا كان احد اسباب الحرب العالمية التانية ..
.
خرجت امريكا من الحرب العالمية التانية كسبانة .. عايزة تبنى بلدها بقى .. عملتها مسيطرة على الاسواق العالمية .. ثقة كثير من الدول فى الدولار تخطت ثقتهم فى الدهب نفسه .. فرصة محصلتش .. فرصة لأكبر عملية نصب وسرقة فى التاريخ .. فضلت امريكا تطبع دولارات تطبع دولارات وتشترى كل حاجة عايزاها من برا .. بدون ما يكون فيه غطاء من الذهب للدولارات المطبوعة .. لإن المفروض كمية الدولارات المطبوعة = سعر الاحتياطي من الدهب .. يعنى لو انت عندك فى البنك كيلو دهب وطبعت 1000 دولار هيبقى سعر الجرام 1 دولار .. ولو طبعت 10000 دولار هيبقى سعر الجرام 10 دولار .. كل ما تطبع اكتر كل ما قيمة الدولار تنخفض مقابل قيمة الدهب .. طيب هل دا أثر على اقتصاد امريكا و وقع قيمة الدولار بعد طباعته بكميات بشعة ؟؟
.
الاجابة لا .. لان امريكا فضلت تطبع دولارات من غير ما الدول التانية تعرف .. السوق الداخلى مبيتأثرش بكمية الدولارات اللى بتنطبع دى .. التضخم ثابت لإن الدولارات المطبوعة بتتصرف برا امريكا مش جواها .. بعكس مصر مثلا لو الاحتياطى خلص ومعرفوش يتصرفوا فطبعوا فلوس .. هتلاقى الحاجة اللى بجنيه بقت بخمسة جنيه .. فالكلام دا معملش مشكلة خالص لامريكا وفضل الحال على كدا عشرات السنين .. كل ما تحب تستورد حاجة من برا تطبع شوية دولارات وتبعتهم عالجزمة للبلد المصدرة 😀
.
فى مطلع السبعينات حصلت كارثة .. بعض الدول طلبت بيع كمية من الدولار لأمريكا .. يدوها دولارات وياخدوا منها دهب ودا حقهم .. زى ما كان زمان الجنيه المصرى ايام العز ممكن تروح البنك وتبدله بجنيه دهب .. ايامها مكناش لسة ربطنا الجنيه بالدولار .. المهم امريكا قشعرت .. هااااااار اسود .. لو ربع الدول طلبت تبديل دولاراتها بدهب امريكا هتفلس وهتدان للدول التانية واقتصادها هيروح فى داهية .. تعمل ايه ؟؟ تعمل ايه ؟؟ دبرت شوية الدهب مقابل الدولارات اللى باعتها الدول دى .. وبعدين لجأت لحركة صايعة اوى .. اشتغل الدبلوماسيين الامريكان بالتوازى مع الساسة ورجال الاقتصاد على الدول المصدرة للبترول .. واقنعوهم انهم يخلوا العملة الرسمية لتداول البترول هى الدولار .. اوووووووووووبا .. طب دى حركة صايعة ليه ؟؟
.
لسببين .. الاول انها تضمن ان كل الدول هتبقى محتاجة الدولار علشان تقدر تشترى السلعة الاساسية دى ( النفط ) .. وبالتالى مفيش دولة هتجرؤ على انها تبدل الدولارات اللى حيلتها بشوية دهب ومع اول ازمة طاقة عندها تحتاس فى الدولار و تتنفخ .. والتاني انها ضمنت لنفسها الحصول على البترول فى اى وقت من اى بلد ببلاش .. ودا السبب اللى يخلى امريكا اللى عندها نصف الاحتياطي النفطي فى العالم ( وفقا لمنهج جغرافيا مستوى رفيع اللى اخدناه فى الثانوية العامة ^_^ ) .. متنتجش البترول بنفسها غير بكميات صغيرة جدا تخزي بيها العين وباقى استهلاكها بتستورده من برا .. ببساطة لانه ببلاش .. كل ما تحب تستورد بترول هتطبع شوية ورق وخلاص .. عايزك تاخد بالك ان امريكا بتستهلك اكتر من خمس انتاج العالم من البترول لوحدها .. 4% من البشر بيستهلكوا 22% من بترول العالم !!
.
زادت هيمنة الدولار الامريكي يوم بعد يوم .. خلينا نقول ان ثلثى التجارة العالمية حاليا بالدولار .. انت نفسك لو بتشترى حاجة من برا مصر ايا كانت منين هتشتريها بالدولار حتى لو من الصين .. المعاملات المالية الدولية والعقود معظمها بالدولار .. لما مجلس الامن يحب يصدر قرار فيه قيمة مالية معينة على سبيل العقوبة او الدعم العسكري او المعونة بيكون برضو بالدولار .. فالدولار اصبح المهيمن الاوحد على الاقتصاد العالمي ..
.
كفاية المرادي ونكمل فى جزء تاني بإذن الله