الاثار السلبية لتعطيل الدراسة على الاقتصاد

.
ابتداءا مش عايزك تفهم من عنوان البوست ان القرار خاطىء .. بالعكس دا صح جدا وياريت كان جه بدرى شوية علشان نتلافى عدد المصابين اللى هيوصلوا 1000: 5000 ان مكنش اكتر خلال اسبوعين من النهاردة ( اسأل الله ان يخيب ظني ) .. ودا اللى هيخليهم فى الغالب يمدوا تعطيل الدراسة مرة تانية واحتمال يلغوا الترم
.
البوست بكلمك فيه عن التكلفة الضخمة لقرار ى دا – اللى بالرغم من ارتفاعها لكنها لا شىء بالنسبة لكلفة تأخيره – وهوضحلك ان القرار مكنش سهل بالمرة زى ما الناس متخيلة ..
.
الاحصائية اللى فى الصورة دى بتوضحلك التركيبة السكانية لمصر سنة 2019 وفقا للمركزي للتعبئة والاحصاء .. هتلاحظ ان تقريبا 40% من السكان اعمارهم ما بين 5 و 24 سنة ( الفئة اللى فى التعليم الجامعي وما قبله ) .. وهنشيل اطفال الحضانة من حساباتنا .
.
دا معناه اننا عندنا 40 مليون طالب كان بيخرج من بيته الصبح في جيبه فلوس .. الفلوس دى بتتوزع على اطراف كتير جدا .. مواصلات عامة وخاصة .. كافيهات .. مطاعم .. تصوير مستندات .. كورسات .. سناتر .. محلات هدايا للعيال الكيوت .. إلخ .. كل طرف من الاطراف دى كان بيعتمد على الـ 40 مليون دول فى تحقيق عائد بشكل اساسي ( زى السناتر والكورسات وتصوير المستندات ) او ثانوي ( زى المواصلات العامة والخاصة ) ..
.
فلو قولنا متوسط انفاقهم يوميا 10 جنيه بس فاحنا بنتكلم عن ركود حركة اموال بقيمة 400 مليون جنيه يوميا .. يعني فى اسبوعين بدون يوم الجمعة حوالى 5 مليار جنيه .. متخيل الرقم ؟!!
.
بشكل غير مباشر هتلاقى ان فيه قطاعات تانية خالص بعيدة عن الليلة دى بتتأثر .. فتعالى مثلا بص لملابس الطلبة اللى بيخرجوا بيها .. هتلاقى انه بقى يلبس اقل .. فالحاجة هتغسل اقل .. السحب على مساحيق الغسيل هيقل فقطاعهم هيخسر .. المغاسل اللى فى محيط تجمعات الطلبة المغتربين هتخسر .. وبعد ما بقوا يلبسوا لبس خروج اقل معدل اهلاك الملابس هيقل .. فالطلب على الملابس الجديدة هيقل .. قطاع الملابس هيخسر ..
.
.
مش بس كدا .. دا قرار زى دا خلي الناس تستوعب ان ايه دا ؟ دا الحوار طلع بجد ..
بغض النظر عن حالة الألش اللى مجتاحة السوشيال ميديا على الفايروس واللى هتتوقف خلال اسبوعين بالكتير لما الفايروس يوصل لكل شارع فى مصر .. لكن دا هيرفع سعر اى حاجة متعلقة بالفايروس .. واحنا شوفنا حوار الكمامات بنفسنا ..
وهيبقى منبت للشائعات لولاد الكلاب اللى هيستغلوا الازمة .. مش بعيد تلاقى مصنع خل مثلا كبير يلاقى مبيعاته قلت فيقوم ينشر اشاعة على فيس بوك تقول الخل بيموت الفايروس ويبدأ يصنع بخاخات خل .. هيدفع فى حملته 20 الف جنيه وهيكسب 20 مليون جنيه والناس بعد يومين تلاتة مش هتلاقى الخل الفظيع على ارفف السوبر ماركت ..
.
فوق دا كله .. خوف الناس من الازمة هيخليهم يعيدوا تفكير في كل السلع والخدمات اللى بيدفعوا فيها فلوس .. ويقسموها لاساسيات ورفاهيات .. فسلع كتير جدا سوقها هيضعف بسبب ان الناس بتصنفها كرفاهيات .. ودا السبب اللى خلاني من 10 ايام تقريبا اتوقع انخفاض اسعار الدهب .. مش تنجيم هو ..
.
حاجة اخيرة هقولها وان مكنش ليها علاقة بالبوست :
شراءك لكمية سلع مرتبطة بالازمة بكميات اكبر من حاجتك بكتير حرام ومترضيش ربنا .. عايز تشترى مطهرات اشترى اللى تكفيك اسبوعين تلاتة .. متجبش مطهرات سنة كاملة بحجة ان سعرها هيزيد .. وييجي اخوك ولاجارك من بعدك يشترى ميلاقيش لانك انت واللى زيك فضيتوا البلد منها .. اتق الله .. انت بتضر نفسك و بلدك واعز الناس عليك ..