انهيار امريكا الوشيك .. الجزء الثاني

(( عبقرية صدام التى قتلته ))

احتراما لوقتك البوست هياخد منك 3 دقايق..

اتكلمنا المرة اللى فاتت عن اكبر عملية نصب فى التاريخ .. امريكا اللى كانت بتطبع دولارات بدون غطاء من الذهب وبتشترى اى حاجة عايزاها بدون مقابل .. و ازاى اتصرفت لما كانت على وشك الفضيحة .. المرادي هنكمل الحدوتة ..
.
.
صدام حسين رحمه الله كان متغطرس جدا .. بلطجته على الداخل العراقي ( شيعة واكراد ) و على دول الجوار ( ايران و الكويت ) وصلته لفرض عقوبات اقتصادية على العراق .. حصار اقتصادي .. مصطلح كنا بنسمعه زمان كلنا باستمرار (( النفط مقابل الغذاء )) ..
.
.
العقوبة دى ببساطة معناها ان العراق ميقدرش يبيع برميل واحد بشكل مباشر .. مجلس الامن بينظم عملية بيع نفط العراق للدول التانية وبياخد هو تمن النفط دا يحطه فى حساب بنكي خاص بالعراق .. وبعدين يشترى سلع غذائية أساسية بالفلوس دى و يبعتها للعراق .. بحيث العراق متمسكش فلوس فى ايديها تشترى بيها اسلحة او تستأنف بيها برنامجها النووي .. طب ايه علاقة الكلام دا بالموضوع بتاعنا ؟؟!!
.
.
سنة 2000 العبقري صدام حسين أعلن الحرب على امريكا .. حرب اقتصادية كادت ان تطيح بأمريكا بدون ضرب رصاصة واحدة .. ازاى الكلام دا ؟؟
صدام استغل ان الدول الاوروبية ( اصحاب القوى العسكرية ) .. اتجمعوا وعملوا عملة جديدة اسمها (( يورو )) .. واستغل ان اليورو كان فى هبوط وقتها و وصل لادني مستوياته ادام الدولار والدول الاوروبية كانت هتتجنن و عايزة ترفع من قيمته بأى شكل قبل ما ينهار وتنهار معاه اقتصاداتها .. فطلع المعلم وقدم طلب لمجلس الامن وقالهم انا عايز ابيع النفط العراقى باليورو مش الدولار .. طااااااااااااااااااخ ..
.
.
أظنها كانت من اسود الليالي على امريكا على مدار تاريخها .. امريكا مش قادرة تقول لا لإنها معندهاش مبررات لرفضها ولو لمحت بالرفض هتثير الشكوك حواليها وتتفضح .. فى نفس الوقت الدول الاوروبية ما صدقت .. وبمجرد ما تقدم صدام بالطلب اليورو ارتفع .. فما بالك بقى بقيمة اليورو حال تنفيذه ؟!! فرصة متتعوضش .. كذلك روسيا .. يا سلام يا سلام .. فرصة تدي امريكا على قفاها .. فالخلاصة ان كل الدول العسكرية والصناعية الكبري تقريبا كانت فى كفة و امريكا فى كفة تانية ..
.
.
ودا كان احد اهم الاسباب اللى خلى امريكا تعجل بضرب العراق .. عملت التمثيلية اللى كلنا عارفينها وقالت فيه اسلحة دمار شامل فى العراق .. الخبراء راحوا يفتشوا وطلع د.البرادعي قال العراق خالية من اسلحة الدمار الشامل .. عملت فيها من بنها وطاااااخ ضربت العراق .. انهارت العراق .. ودى كانت رسالة مادية من امريكا لاى دولة تفكر فى نفس الفكرة اللى فكر فيها صدام حسين .. خاصة دول الخليج اللى عجبتهم فكرة تنويع عملة تداول النفط وبدأوا يعقدوا مؤتمرات وندوات لمناقشتها ..
.
.
بعدها بكام سنة .. ايران لعبت نفس اللعبة .. طلعت وقالت احنا بصدد انشاء بورصة عالمية للنفط تتعامل باليورو .. طاااااااااخ .. ضربة تانية لأمريكا .. بس المرادي الموضوع مش زى الاول .. روسيا اتعلمت من التجربة السابقة و قررت التدخل ومساندة الجانب الايراني بشكل صريح .. وهنا بقى امريكا جابت ورا واستوعبت ان الحل مع ايران مش التدخل العسكري زى ما حصل مع العراق .. الحل فى احتواء ايران ودا اللى حصل فعلا .. ادام الناس بيتخانقوا و من ورا الناس امريكا بتبعتلهم بلوتونيوم ويورانيوم ومظبطاهم .. والكلام دا لا يخفى عن اى متابع جيد للاخبار .. حاليا تربط امريكا و ايران علاقة (( زواج متعة )) ..
.
.
بص كدا ناحية امريكا اللاتينية .. تحديدا فنزويلا .. هتلاقى تجربة مشابهة حصلت فى نفس الوقت .. رئيسها هوجو تشافيز اخد قرار كاد ان يودي بحياته .. قرر انه يبيع نص نفط فنزويلا بالدولار و النص التاني باليورو .. طاااااااخ .. امريكا بتصرخ .. فقررت انها تكون احد الرؤوس الخفية لخطفه والانقلاب عليه .. لكن فشلت محاولة الانقلاب وخدوا على دماغهم .. وكان الحل فى انهاك فنزويلا اقتصاديا بغرض الضغط عليها للرجوع للدولار ..
.
.
فأمريكا بتعافر بقالها سنين علشان متتفضحش .. امريكا غير قادرة على تسديد تمن 10% من قيمة الدولارات فى العالم بالذهب .. ولو سقطت هيمنة الدولار على الاسواق العالمية امريكا هتنهار فورا .. ومش امريكا بس .. دى كل الدول اللى الاحتياطى النقدي بتاعها من الدولار ومنها مصر .. فمفيش حل ادام امريكا غير انها تفضل تعافر تعافر علشان تأجل انهيارها .. اما الدول اللى اجهزتها المصرفية بتتخذ من الدولار احتياطي نقدي اوحد ليها زى مصر فمفيش حل ادامها غير انها اما ترجع لاحتياطي الذهب او انها تخلى الاحتياطى بتاعها عبارة عن سلة من عملات مختلفة .. دولار ويوروا و ين و استرليني .. بحيث لو وقع اى اقتصاد فيهم الاحتياطى من العملات التانية يسندها لحد ما تتعافى .. غير كدا هتروح فى داهية ..
.
.
احنا مش من مصلحتنا سقوط امريكا فى الوقت الحالي .. من مصلحتنا اننا نستعد الاول لانهيار امريكا وبعدين نستمتع بالجلوس على الصوفا ادام التليفزيون ونعملنا حلة فيشار كبيرة تسلينا واحنا بنتفرج على امريكا وهى بتنهار .. وبعدين نبقى نفكر مين العدو القادم وازاى هنتعامل معاه ..
.
.
وبالمناسبة .. انهيار امريكا مش هيكون اقتصادي بس .. النتيجة الحتمية للانهيار الاقتصادى هيكون انهيار جغرافي .. فى دولة ذات طابع فيدرالي .. الولايات الغنية هتستقل بنفسها و هتتبقى بعض الدويلات الصغيرة من الولايات الكحيانة .. فربما نشوف تفكك مشابه الى حد كبير لتفكك الاتحاد السوفييتي .. مجموعة كبيرة من الدويلات و دولة واحدة كبيرة منهكة شعبها مش لاقى ياكل ..