تتصرف ازاى فى حالة الاختطاف؟
.
ابتداءا هقول التفاصيل اللى تهمك فى حادثة امبارح ..
اللى حصل اننا ( انا و Besho و احمد و محمد اللى شغالين معانا ) اتخطفنا فى فيلا فى بني سويف .. الغلط اللى عملوه هنا انهم مأخدوش الموبايلات !!
في الاول حصلت مشادة كلامية بيني وبين كبيرهم .. عايز فلوس؟ مفيش فلوس .. هاخد العربية اللى معاكم .. مفيش عربية هتتاخد .. حوار طويل اوى سعيت لتهدئته فى الاخر لحد ما ابدأ تسجيل صوت بالموبايل.
.
بدأت تسجيل الصوت و بعدين كلمت كبيرهم وخليته يقول كل الكلام اللى فات .. يعني مش هتخرجوا النهاردة على رجليكم لو مفيش فلوس .. إلخ ..
.
اخدت اللى انا عايزه .. سيبت الدنيا تهدي تاني .. قلت لبشير يسجل اللى هيحصل ويفضل يوقعهم فى الكلام .. وهو ما شاء الله قام بالمهمة على اكمل وجه وصورهم بحشييش كمان ^_^ ..
.
خلعت بشكل او بآخر .. حاولت اتصل بالنجدة فشلت .. بعت الرسالة دى لاول حد جه فى بالى .. لصديق مقدم فى الامن الوطني ( محمد انا مخطوف فى بني سويف الجديدة .. الحي كذا .. و وجنبي لوحة توزيع كهرباء رقم كذا ) .. حاولت طبعا ابعت لوكيشن لكن للاسف النت مكنش عايز يشتغل.. وبعت لمحمود اخويا ( نص ساعة لو مكلمتكش بلغ انى مخطوف ) .. مفيش دقايق وتلقيت اتصالات من النجدة ورئيس مباحث القسم هناك و نائب المأمور..
.
ساعتها اكتشفوا انى مش موجود .. مكانوش مديين خوانة خاصة انها منطقة فيها بيت ساكن و20 لا والعربية معاهم وانا معرفش حاجة هنا .. بعد ما اكتشفوا طلعوا بعربية يدوروا عليا وقبل ما يحصل كنت داخل عليهم برجالة الداخلية ..
.
اللى حصل دا كان سهل بشكل كوميدي بسبب غباءهم .. اضطرابهم ..
.
.
طيب انت مفروض تعمل ايه لو اتعرضت لحاجة زى دى ؟!
- اول حاجة تعملها SMS لاخوك او صاحبك او اى حد .. انك مخطوف وفى المكان الفلاني ..
- ابعت اللوكيشن .. ويستحسن Live Location علي الواتس ..موقعك هيفضل يتحدث عند الطرف التاني باستمرار لحد ما موبايلك يتقفل .. وفي الغالب لو مطلوب لفدية موبايلك مش هيتقفل..
- مطلوب منهم يتصلوا بالنجدة ودى اكتشفت انها بتختلف من مكان لمكان .. ممكن تبقى فى مكان صعب توصلها ومكان تاني بيردوا بمجرد ما تتصل علي حسب الضغط عليهم .. وخد بالك ان كل ما كان التبليغ بدرى كل ما فرصتك في النجاة تبقى اكبر.
- ابعت كل المعلومات اللى شوفتها عن الخاطفين .. يعني مثلا تقول ( 6 رجالة فى سن الاربعين ومعاهم آلي وطبنجة و اسلحة بيضاء واحد منهم ابيض وطويل ورفيع وبيقولوله يا زناتي ) ..
طب لو ملحقتش تعمل كل دا والموبايل اتعلق؟
- لازم تفهم ان اللى خاطفينك خايفين زيهم زيك .. انت ممكن تبقى قلبك جامد ومش خايف لكنهم بيبقوا مرعوبين لانهم عاملين جناية ولو حصل اشتباك واتصفوا ملهمش دية ..
- العب على النقطة دى .. خليك هادي واكسب وقت وفكر بهدوء فى الوقت اللى هم مشدودين فيه ومش عارفين يفكروا ..
- متوصلش الحوار ابدا لانك تشتبك بالايدي .. العنترية هناك هتخرجك من المشكلة قطع غيار بشرية.
- مفيش حاجة اسمها منديل عليه مخدر بيتحط على المناخير ينيم الواحد فى ثانية .. دا هبل .. دا لا هيحصل معاك ولا مع غيرك .. ولو كنتى بنت واتخطفتي من مكان مأهول متبطليش صويت .. حتي لو لزقوا بقك .. صوتي بصوت مكتوم ممكن يتسمع وخبطي على الازاز او اى حاجة تطوليها .. تماسكك فى الوقت دا ممكن يكون سبب فى نجاتك ..
- لو كل دا فشل .. وموضوع الاختطاف طول .. ابدأ مفاوضات انهم يسيبوك وانت هتدي الحكومة معلومات مضللة .. وملوش لزمة يعقدوا الموضوع اكتر و يورطوا نفسهم اكتر .. وفى الوقت دا كان زمانهم خاطفين خمسة ستة .. ومحدش من اهلك هيعبرك ببصلة ويدفع 4 جنيه على بعض علشانك .. إلخ .. وحاول تكسب ثقتهم ..
.
.
ممكن بعد كل دا كل محاولات تفشل .. لكن تبقى اخدت بالاسباب وعملت اللى عليك ..
