.
النكد سلوك مكتسب مش جبلي … الستات مبتتولدش بيه ..
ولو معرفتش السبب وجاهدت انك تساعدها فى التخلص منه بيتك هيتدمر او هتعيش تتمني الموت او هتسلك طريق من الطرق الحرام ودى اسهل حاجة فى عصرنا للاسف ..
.
عادة النكد بيكون سببه حاجة من اتنين ..
.
1- اما الست محصلتش على الرعاية الكافية فى بيت ابوها .. مع تسليم دماغها للمسلسلات التركي المليانة محن ودراما .. فبتعوض افتقادها للدفء والاحتواء فى بيت اهلها بانها بتعيش حياة خيالية موازية .. تتخيل نفسها جزء من المسلسلات دى اللى الحياة كلها فيها عبارة عن كلمات حب و فراشات بتطير و عيون بتلمع .. تنتقل بعدها لبيت زوجها بالامراض دى ودايما الجواز بيكون اقل من توقعاتها .. وللاسف معظم الازواج مبيستوعبوش المشكلة دى وتأثيرها .. وبالتالى مبيسعوش لحلها ..
.
2- السبب التاني ان الزوج من الاول موفرش ليها الاحتواء الكافى .. ملقتش الدفء اللى كانت بتحلم بيه بعد الانتقال لبيتها وحياتها الخاصة .. فبتبدأ فى افتعال مشاكل تنتج عنها مظلوميات مزيفة تستجلب بيها شفقة الزوج .. لما يشوفها فى حالة نفسية سيئة هيشعرها بحنانه واحتوائه .. وهنا فى الغالب اما بتكون متجوزة زوج جلنف بيوبخها وينفضلها .. او زوج حنين يسىء التصرف فيديها حنان واحتواء بالهبل من غير ما يعرف سبب النكد المفاجىء دا ايه ويعالجه .. وبالتالى الست بيحصل عندها اشباع نفسى بتصرفها دا .. وبتدور كل شوية على انها تحس نفس الاحساس تاني .. فتنكد وتنكد وتنكد ..
.
.
عارف ان السطرين اللى هقولهم دول هيزعلوا ناس كتير مني .. بس مهمين
معظم البنات مبيلاقوش احتواء فى بيوت اهاليهم .. كام اخ بيحضن اخته ويبوسها من راسها وخدها وبيصاحبها و يخرجها ويخصصلها جزء من وقته ؟!! كام اب بيعاقب ابنه لما يطلب من اخته ( تخدم عليه ) وتعمله مشروب او تجيبله مية .. او يسخف عليها بهزار البوابين والتلطيش فى الرايحة والجاية ؟!! كام بنت فى مجتمعنا مبتحسش انها مواطن درجة تانية فى بيتها ؟!!
.
.