مبادرة تمويل الاسكان الاجتماعي وانقاذ الاقتصاد
احتراما لوقتك البوست هياخد منك دقيقتين
.
المبادرة ماهي الا محاولة لتأجيل انفجار الفقاعة العقارية .. طب يعني ايه فقاعة عقارية وازاى حصلت ؟
- قطاع الانشاءات نشط جدا فى فترة وحقق مكاسب مهولة.
- عدد كبير جدا من المستثمرين قرر يدخل اللعبة بالتزامن مع خطط الدولة للتوسع زى العاصمة الجديدة والعلمين الجديدة وغيرهم.
- البنوك تساهلت جدا فى التمويل العقاري لتغطية حاجة الشركات المنفذى للمشاريع المختلفة.
- فجأة هيحصل تشبع فى السوق .. خلاص اللى كان عايز يشترى ومعاه فلوس اشتري .. وعدد ضخم جدا من الوحدات مش لاقي اللى يشتريه.
- الشركات مش عارفة تبيع .. فبالتالى مش هتعرف تسد اقساط القروض ..
- القروض دي اللى هي اصلا اموال المودعين.. يعني الشركة بتقترض من حسابك انت فى البنك والبنك عبارة عن وسيط ( بيعرف ) الناس ببعضها وبياخد فرق النسبة بين فوايد حسابك و فوايد القرض .. ففلوس الناس بقت فى خطر .
- النتيجة باختصار .. ازمة مصرفية وانهيار للقدرة الشرائية ..
.
.
الفقاعة العقارية ازمة تكررت كتير جدا مع دول مختلفة .. الولايات المتحدة .. اليونان .. تركيا .. ايرلندا .. ومن كام سنة حصلت مع دبي .. فكلامي هنا مش اجتهاد شخصي .. دا سيناريو بيتكرر بالحرف ..
.
طيب ايه علاقة تمويل الاسكان الاجتماعي بالفقاعة العقارية؟
دي حركة ذكية من الحكومة هتحقق بيهم مكسبين :-
1- هتصرف عدد كبير من الوحدات ( البايرة ) وتعيد تحريك سوق العقارات من تاني ودا معناه ان الشركات المدانة هتقدر تسد اللى عليها.
2- هتخلق مديونيات جديدة لكن موزعة على عدد اكبر .. فلو عندك شركة عندها 1000 وحدة سكنية .. بعد ما كانت الشركة مكلفة انها تسد مليون جنيه شهريا ودا قد تعجز عنه .. فبقت المديونية متوزعة على 1000 مواطن كل مواطن مطالب بسداد 1000 جنيه شهريا فاحتمالية تعثر عدد منهم احتمالية ضعيفة جدا والمخاطرة هنا قلت لادني مستوياتها..
.
.
طيب هل الاجراء دا علاج ولا مجرد وسيلة لتأجيل المشكلة ؟
لو القطاع المصرفي استمر فى سياسة تيسير التمويل العقاري على مستوى الشركات ( باستثناء الاعمال الانشائية بالمدن الجديدة ) .. فدى مجرد مسكن بيعالج العرض مش المرض ..
لو القطاع المصرفي غير من سياسات التمويل العقاري على مستوي الشركات فاقدر اقول انها خطوة عظيمة وعلاج حقيقي قد يؤتي ثماره.
.
تعديل :
قد يفهم من كلامي ان المواطن هنا بيتم التضحية بيه لانقاذ الشركات .. دا مش حقيقي .. الكل خارج من اللعبة دى مستفيد .. والمواطن بيدفع قسط قد اللى كان هيدفعه فى ايجار شقة .. وفى الاخر هيتملك شقته ..
