.من فترة قريبة بعت 24 اسطوانة اكسجين 40 لتر لجمعية خيرية .. الاسطوانات دي اساسا كنا بنملاها ثاني اكسيد الكربون وبنستخدمها مع ماكينات لحام الميج في المصنع زى اللى فى الصورة .. لكن هي نفسها اللى بتتملي اكسجين .. وبالنسبة للمهندسين فهسيبلهم معلومة هندسية فى اول كومنت يبصوا عليها ..
.
المهم ان الجمعية دى مفروض تاخدهم تملاهم اكسجين وتوفرهم للمريض مجانا الفترة اللى محتاج فيها انبوبة ..
.
اتصلت برقم الجمعية الارضي بعد كام يوم علشان ابعتلهم اسطوانات تانية من عند صديق بيصفي مصنعه حابب يتبرع بيهم .. اللى رد عليا مرماش حتي السلام .. قاللى ( تأمين الانبوبة 3000 و اليوم ب 200 ) ..
.
فى الفترة دي كنت معزول .. اتصلت بمدير الجمعية رد عليا بكل برود وقاللى ( والعاملين عليها ) .. وانه عنده موظفين لازم يقبضوا وانه كدا ارخص من غيره .. فشـ*ـته وقلتله انا ممضتش على انى تبرعت بيهم .. بكرة هبعتلك عربية ترفعلى عليها كل الاسطوانات..
.
العربية راحت اخدتها و ودتها لمقر من مقرات جمعية انصار السنة و دول اضمنهم برقبتي ..
بالرغم انى طول الوقت عندي تحفظ في التعامل مع الجمعيات الخيرية وطالبي الصدقات على السوشيال ميديا لكنى للاسف غلطت وظننت انهم مش هيستغلوا الازمة .. بالمناسبة لما حسبتها لقيتهم بيحققوا صافى ربح مش اقل من 120 الف جنيه شهريا من ورا الاسطوانات دي بس .. واكيد فيه متبرعين تانيين ..
.
.
دا نموذج لاحد مستغلى الازمة ..
اما بخصوص اسعار انابيب الاكسجين .. فطبيعي سعرها يرتفع زى اى حاجة متعلقة بالازمة لان المستورد بقى يستوردها بسعر اعلي ؛ وان كان كتير من التجار لقوها فرصة وزاطوا فيها لمضاعفة ارباحهم ..
.
.
والحل من وجهة نظري ان الدولة تعفى اى واردات ليها علاقة بكرونا من الجمارك ؛ وان احد الكيانات الصناعية تستورد كمية كبيرة منها بحكم انها معفاة من الجمارك لوقوعها تحت بند ( مسلتزمات تصنيع ) وتضخها فى السوق باسعار عادلة ..
.
تعديل : مقصد كلامي انك لما تتبرع لازم تكون متأكد من الجهة اللى هتقدملها تبرعك لان فيه الكويس وفيه الوحش .. لازم تتحري عنصري القوة والامانة فيهم .. وان كنت افضل ان كل شارع او حي رجالته يعملوا بينهم وبين بعض كيان تكافلي ودى اضمن طريقة ان كل قرش فى تبرعك يروح للي يستحقه ..